Өңірлер жаңалығы

Коронавирус жайлы жалған ақпарат таратқан адам қолға түсті

19 наурыз, 10:21236
Автор: Elorda Aqparat

Түркістан облысының полицейлері жалған ақпарат таратқан күдіктіні анықтады, деп хабарлайды Елорда Инфо Polisia.kz-ке сілтеме жасап.

Келес аудандық полиция бөлімшесіне WhatsApp мессенджері арқылы «бейтаныс тұлғалар коронавирусты жұқтырған» деген Келес ауданының тұрғыны туралы жалған ақпарат таратылып жатқаны бойынша хабарлама келіп түсті. Аталған жайтты полицейлер ҚР Қылмыстық кодексінің 274-бабы 2-бөлігі «Көрінеу жалған ақпарат тарату» бойынша сотқа дейінгі тергеп-тексерудің бірыңғай тізіліміне тіркеді.

Тексеру барысында белгілі болғандай, желіде таралған аудиохабарламадағы әйел 10.03.2020 ж Мәскеу-Шымкент рейсімен Германиядан ұшып келген. Әуежайда оны медицина қызметкерлері қарсы алып, Шымкент қаласындағы пәтеріне үй жағдайындағы карантинге жатқызған. Қазіргі уақытта әйел амбулаториялық ем қабылдап жатыр. Оның денсаулығына төніп тұрған қауіп жоқ.

Жәбірленуші акушер-гинеколог полицияға жалған ақпарат таратушыларды жауапкершілікке тарту туралы өтініш білдірді.

18.03.2020 ж. жедел-іздестіру іс-шарасы барысында Келес аудандық Полиция басқармасының қызметкерлері жалған ақпарат таратушыны анықтады. Ол Сарыағаш ауданының тұрғыны болып шықты. Күдікті өз әрекетін толық мойындап, қылмыс жасағанына өкінді.

Қазіргі уақытта аталған жайт бойынша сотқа дейінгі тергеу амалдары жүргізіліп жатыр. Сараптама тағайындалды.

Айта кетейік, осыған дейін Мемлекет басшысы Қасым-Жомарт Тоқаев Қазақстан халқына жасаған Үндеуінде жалған ақпарат таратып, дүрбелең туғызатын әр адам заңға сәйкес жауапқа тартылатынын мәлім еткен болатын.




Наверх