Қоғам

Асхат Аймағамбетов онлайн оқытудағы 4 бағытты атады 

31 наурыз, 14:33611
Фото интернеттен алынды Фото интернеттен алынды

Білім және ғылым министрі Асхат Аймағамбетов онлайн оқытудағы 4 бағыт туралы түсіндірді, деп хабарлайды Елорда Инфо

«Жалпы, қашықтықтан оқыту бойынша 4 бағыт бар. Оның бірінші бағыты – теледидар арқылы сабақ тапсырмасын беру. Яғни «Балапан» және «Еларна» телеарналары арқылы сабақтардың жүргізілетіні өздеріңізге мәлім. Мамандардың есебінше, төртінші тоқсанда 3 360 сабақты түсіру қажет. Қазіргі уақытта 300-ден аса сабақ түсіріліп, дайындалды. Бұл да – күрделі жұмыс. Ұстаздарымыз бұған дайын болмаған. Қазіргі індет тарап жатқан уақытқа қарамастан ұстаздарымыздың студияға барып, өздерін тележүргізуші ретінде де жаңа қырларынан танытып, түсірілімдерге қатысып жатыр. Балаларды жалықтырмайтындай қызықты етіп, сабақты 15 минутқа сыйғызу үшін жұмыс істеуде. Сол үшін ұстаздарымызға алғыс айқым келеді», – деді Білім және ғылым министрі. 

Министрдің сөзінше, қашықтықтан сабақ өткізудің екінші бағыт – радио. Яғни кейбір теледидар көрсетпейтін ауылдарда Қазақ радиосының әуетолқыны арқылы кестеге сәйкес сабақ жүргізілетін болады. 

«Үшінші бағыт пошта арқылы жүзеге асырылады. Еліміз бойынша 1 250 шағын елдімекен болса, ондағы мектепте оқитын 4-5 бала тұратын ауылдар бар. Бұған дейін олар мектептерге арнайы көлік арқылы жеткізіліп отыратын. Қазіргі жағдайда да оларға білім беруді тоқтатпаймыз. Сондықтан олар сабақты пошта арқылы алатын болады», – деді А.Аймағамбетов.

Ал төртінші бағыт – интернет жүйесі арқылы жүргізілетін бағыт. 

«Қысқа уақыттың ішінде интернет арқылы білім беру цифрлық платформаларын дайындадық. Алайда оны дайындау – бір бөлек, ал қолдану – мүлде басқа мәселе. Сондықтан барлық білім беру мекемелерінде осы платформаларды дұрыс пайдалану бойынша жұмыстар жүргізілуде. Бұл жұмыспен білім басқармалары айналысып жатыр», – деді министр.




Наверх